Sa hijshëm! – Zoica Gjolla Popi

Sa hijshëm!

Vallë
frymëmarrje të plotë
në gjysmë shpirti
a mund të ketë?

I lodhur mendimi u thinj
pa u plakur akoma.

Në cilën skutë
u fsheh rrezja
në cilën ngjyrë
mbeti përthithja
sa lart mbi retë
qëndroi e shkreta?

Gjysmën e shpirtit
kërkoj i shtrenjti im
mos thuaj …
a … je… a… s’je…
se dhe vetë s’e di
a …jam…a…s’jam…

Dobësi e imponuar
në kurth e zure
qenien time…

Por unë jam… unë jam…

Me fuqi shpendësh fluturoj
me fuqi kuajsh vrapoj
sa afër
sa hijshëm
gjithë botën do ta falja
për një shpirt të plotë, kur ndjen!